Códigos

Овие правила (códigos) служат за да ни помогнат да избегнеме непријатни ситуации и да можеме непречено да уживаме во магијата на тангото. Тие не се направени за да направат некому да се чувствува недобредојден, туку да ја ограничат можноста од непријатности кои може да ни го расипат доброто расположение.

Некои мислат дека ова се правила до кои треба да се придржуваат само другите, а не и самите тие. Други пак, сметаат дека ваквите правила важат само за милонгите кои се одржуваат во Буенос Аирес. Ги покануваме сите нив да се обидат да ги почитуваат за да ја сфатат разликата, за да увидат која е потребата од постоење на вакви правила.

Ние ги почитуваме овие правила без оглед на тоа дали сме почетници или искусни.

• Cabaceo – Мажот ја поканува жената. Секогаш кога е можно ние го користиме овој начин на поканување. Cabaceo е согласување да се танцува заедно преку суптилно движење на главата, израз на лицето, преку контакт со погледите или намигнување. Жената одговара соодветно, доколку прифаќа, или ја врти главата настрана, доколку одбива. Тоа може да се случи без да забележи никој освен оној за кого е наменето - со тоа и двајцата може да ја избегнат непријатната ситуација на одбивање.
• Откако преку cabaceo е договорен танцот, мажот застанува на работ на подиумот во близина на масата на жената и чека партнерката да му се придружи.
• Поискусните парови танцуваат на работ на подиумот, почетниците во средината. Средината не е за вежбање, за тоа служат практиките. На милонга ние уживаме.
• Кога танцуваме ние не го мешаме социјалното танго и сценското (начинот на кој танцуваат популарните сценски парови)
• На крајот од тандата мажот ја придружува жената до нејзинта маса. Често девојката танцува со затворени очи, па кога ќе ги отвори лесно може да се случи таа да е дезориентирана.

На подиум

• Танцуваме во круг, спротивно од стрелките на часовникот. Линијата на танцот (ronda) оди по рабовите на подиумот.
• Остануваме во рондата се додека трае песната. Ние не танцуваме цик-цак, со излегување од линијата на танцот.
• Избегнуваме да го престигнуваме парот што е пред нас во рондата.
• Во текот на милонгата на партнерот (ниту на било кој друг) не му даваме, ниту бараме, инструкции или совети како да се танцува. За тоа постојат практики. Милонгата е настан за опуштање и уживање, настан на кој не треба да се обрнува внимание на она што е погрешно.
• Во текот на танцот нозете треба да бидат што поблиску на подот. Ние не правиме болеа на полн подиум. Тоа ни помага да нема повреди поради високо кренати штикли.
• Машките никогаш не прават чекор назад во линијата на рондата затоа што не може да видат каде се наоѓа следниот пар. Ако веќе мора да направиме чекор назад, пред тоа да го направиме, се ротираме за чекорот назад да го направиме кон средината на рондата.
• Ние го почитуваме просторот на другите: не се враќаме назад затоа што не знаеме што има зад нас и не одиме преблиску до парот пред нас зашто не сакаме да им правиме притисок.
• Додека танцуваме постои многу малку простор околу нас кој може да го сметаме за свој. Остатокот е простор што го делиме со другите. Од секого од нас се очекува да го почитуваме тоа.
• Ние не го вознемируваме танцот на другите. Внимаваме да танцуваме во линијата и да не го прекинуваме нормалниот тек на сообраќајот. Почитуваме ако, оние што во текот на танцот сакаат да застануваат за да прават статични фигури, тоа го прават во средината на подиумот.
• Доколку, и покрај внимателноста, се случи паровите да се судрат, пристојно е мажот (кој е одговорен за ориентацијата на парот) да му даде извинување на мажот од другиот пар со движење на раката или со климање на глава.

Извор: Tango Códigos & Milonga Floorcraft

Тангеро е погрешно, милонгеро е правилно

Имајќи предвид дека 99% од луѓето заразени со танго не се професионални танчери и танцуваат само на милонги - јасно е дека сите тие се „милонгероси“

„Тангеро“/„тангера“ е збор што означува некој што танцува танго. Кратко и јасно. И точно! Арно ама, непрецизно.

Многу често јазикот ги одразува нашите мисли и ставови, дури и кога немаме намера тоа да го правиме. Преку зборовите на другите им наметнуваме ставови, дури и кога не сме свесни за тоа. Таков е и овој случај.

Затоа инсистирам на употребата на зборот „милонгеро“, а не „тангеро“. Која е разликата?

За разлика од „тангеро“ кој е збор со многу широко значење, зборот „милонгеро“ е далеку попрецизен. „Милонгеро“/„милонгера“ е човек кој често оди на милонги и танцува.

Сличност - И во двата случаи станува збор за луѓе што танцуваат танго.

Разлика - Зборот „милонгеро“ означува некој што танцува танго на милонги. „Тангеро“ не прецизира каде се танцува тоа танго.

Ова значи дека под „тангероси“ спаѓаат и професионалците кои танцуваат на натпревари, по сцени, на разни шоу претстави, во филмови и спотови и слично. Значи ако дефинираме попрецизно - „милонгероси“ се обично аматери, оние кои играат social tango - „тангеросите“, пак, играат се.

Имајќи предвид дека 99% од луѓето заразени со танго не се професионални танчери и танцуваат само на милонги - јасно е дека сите тие се „милонгероси“.

ЗОШТО ТАНГЕРО? Според мене, зборот „тангеро“ се шири поради неколку причини:

1) Поради тоа што зборот „милонгеро“ и е многу нејасен на пошироката публика. „Тангеро“ го содржи зборот танго и на лаиците им е појасен.

2) Поради тоа што тие што го користат навистина не мислат на „милонгероси“, туку на „тангероси“. Нив им е неугодно да кажат „милонгеро“ за некој чие танцување не е social tango - овде мислам на разните нуево играчи и плагијатори на разни танго селебрити - сценски играчи. Сепак, дури и таквите (со бучкуруш стил на танцување) се само милонгероси, затоа што танцуваат само на милонги.

3) Затоа што свесно сакаат да го наметнат ставот дека сите сме тангероси, независно каков стил танцуваме (притоа мислат на танго милонгеро). Грешка прават во тоа што зборот „милонгеро“ не доаѓа од името на стилот танго милонгеро, туку обратно (танго милонгеро е измислица на Сузана Милер, која така го нарекла стилот на милонгеросите од златното доба). Зборот милонгеро не ги исклучува оние кои играат нуево или што и да е - тој само означува човек што оди на милонги и танцува.